Adventskalender 2015 der TU Chemnitz

„’s Gansl“

Ja, ihr Leit, wos wär Weihnachten uhne e weng Assen, uhne e Weihnachtsgansel. Mei Freind hot’s ganze Gahr über su e klaanes Vögele in Garten rumwatscheln, un or konnt’s gar net erwarten, bis se drinnen in der Pfann log.

An erschtn Feiertog früh sogt sei Alma: „Ich gieh erscht mol nüber ze de Kinner. Albert, du blebbst do un paßt uff, doß is Gansel net abrennt. Tust’s Gansel mol drehe, mol e Schöpkell Brüh drübertrafeln, noochert kast de natürlich aah emol kosten“. Ja, die Reihenfolg, die hot or sich genau gemerkt. Un sei Alma war noch gar net richtig naus, do dacht or, doß dir dos Gansel ja net abrennt! Do hot or de Pfann rausgezugn aus dr Röhr, hot’s Gansel emol gedreht, mol e Schöpkell Brüh drübergetrafelt, un noochert tat or natürlich aah emol kosten. Ober dos schmok gut! Noochert is or naus in Garten, hot de Kuhhosen gefüttert. Ober die sei an dan Tog schlacht wagkomme. Ja, ich ka eich sogn, do is or rei, hot de Pfann wieder rausgezugn aus dr Röhr, hot’s Gansel emol gedreht, mol e Schöpkell Brüh drübergetrafelt, un noochert tat or natürlich aah emaol kosten. Su e zartes Bruststückel, ja, war dos e Genuß, dä’s war e ganz gunges Gansel. Noochert hot or e Pfeif mit Tobak gestoppt, ober hat kaane Zeit die Pfeif auszerachn. Or mußt doch aufpaßen, doß is Gansel net abrennt. Un do hot or de Pfann rausgezugn aus dr Röhr, hot’s Gansel emol gedreht, e Schöpkell Brüh drübergetrafelt, un oochert tat or aah mol kosten. Un wie or su richtig übern Schmatzen war, kam sei Alma rei zer Tür.

„Ober dos riecht gut nooch ne Gansel, du hast mersch doch net abrenne lossen?“ Do zug or de Pfann raus aus dr Röhr, doß se neigucken konnt. Ober do hot se enn Quieckser raus losgelossen un sogt: „Nä, dar olbern Dingrich, itze hot or mir aah noch das Gansel zsammgefrassen.“ Ihr Leit, dos war kaa Gansel mehr, wos in dr Pfann drinne log. ’s war bluß noch su e Gerüst, wos aussog wie e Äfamilienhaus bei’n Bauhebn. „Alma“, sogt do dr Albert, „sog net su e Zeig, doß i dos Gansel zsammgefrasse hob. Ich hob bluß dein Befehl ausgeführt. Hob’s Gansel mol gedreht, hob mol e Schöpkell Brüh drübergetrafelt un emol gekost. Un de mußt mer doch racht gabn, an su enn Vögele is doch aah nischt dra!“

---